Je Wajua!, Tanzania Bado Tupo Nyuma Sana Katika Matumizi Ya Internet?

Katika ulimwengu ambao watu hutumika na utandawazi na si watu kuutumia utandawazi, taarifa na habari ni kiungo muhimu sana katika maisha ya walimwengu. Ili kupata habari za uhakika na kwa muda muafaka basi ni lazima utandawazi uifanye dunia iwe kama kijiji. kwa maana ya kurahisisha mawasiliano baina viumbe waliomo ndani, na hapa ndipo tunapata kujionea matumizi ya mtandao ‘internet’ kama chanzo cha habari na kiungo cha mawasiliano.

Ili kurahisisha mawasiliano baina ya walimwengu kumekua na uanzishaji wa blogu, mitandao ya jamii na vitu mbalimbali katika mitandao ili kurahisha mawasiliano na upatikanaji wa habari.

Suala la mitandao lina msaada mkubwa sana katika jamii tofauti na kundi la watu linavyochukulia. Mtandao unaweza ukatumika kujisomea na kupata maarifa mapya kama si kuongeza, kujuana na watu, kufahamiana, kupata habari na kupata kuwasiliana.

Hapo mwanzo watu walikua wanapata mtandao kupitia kompyuta, ila sasa watu wanaweza kupata huduma za mtandao kupitia simu, saa na vifaa vingine vya kielektronic.

Chachu hii imeongeza ugunduzi na ubunifu wa vifaa vingine vipya ili kukuza matumizi ya kimtandao na kurahisisha kazi kwa watumiaji.

Katika matumizi ya mtandao, jamii na jamii zinazidiana kutokana na sababu zisizo zuilika kwa mfano hali ya maisha ya jamii husika.

Wakati dunia nzima ina idadi ya watu wapatao 7,182,406,565, ni watu 3,035,749,340 ambayo inatengeneza 42.3% tuh ndio wanaotumia huduma ya kimtandao. Hii inaonesha ya kuwa kuna idadi kubwa ya watu hawatumii huduma hii kwa sababu tofauti tofauti.

Lengo la makala hii ni kuangalia nafasi ya nchi ya Tanzania katika matumizi ya mtandao ukilinganisha na nchi zingine za Afrika. Kwa kifupi Tanzania tupo nyuma sana katika matumizi ya mtandao,

wakati inakadiriwa idadi ya watu kufikia 49,639,138 ikiwa na watumiaji wa mitandao 7,590,,794 ambao ni sawa sawa na asilimia 15.3 na 2.5 ikilinganishwa na idadi yaw a Afrika kwa ujumla.Watumiaji wa facebook kwa Tanzania ni 705,460, takwimu hii ni kwa makadirio ya mwaka 2015.

Kwa takwimu hizo inaonesha wazi kuwa Tanzania iko nyuma ya nchi zingine za Africa kwa kiasi kikubwa. Kwa kuanzia Tanzania iko nyuma ya Kenya na Uganda, huku Kenya ikichukua asilimia 47.3 ya idadi yote ya wakenya ambayo ni 45,010,056. Wakati huo huo wakenya 2,045,900 ndio watumiaji wa mtandao wa jamii wa facebook huku wakiipiku Tanzania.

Kwa upande mwengine nchi ya Uganda japo inalega lega katka kiwango ya watu wanaotumia mtandao wa jamii, asilimia 18.2 ya watu wake wanatumia mtandao katika maisha ya kila siku. Kiasi hichi ni kikubwa kulinganisha na 15.3 ya Tanzania.

Kama haitoshi nchi zingine zimeendelea kuiacha nyuma Tanzania katika matumizi ya ‘internet’ mtandao na yale ya facebook. Nchi ya Madagascar ina watumiaji wa internent asilimia 74.7 ya watu wake wote, huku nchi ya pili ikiwa Mali yenye asilimia 72.1. Misri ikiwa na asilimia 53.2, Gabon ikiwa na asilimia 39.3, Mauritius ikiwa na asilimia 39.0, Nigeria ikiwa na asilimia 39.7, Afrika ya kusini kwa 51.1 na Zimbabwe kwa 38.8.

Takwimu hizi ni kwa nchi chache tu za Afrika ili kuonesha ni kwa kiasi gani tumeachwa katika matumizi haya ya mtandao. Si vibaya sana kuachwa kimatumizi kwani siku zote binadamu hatufanani, ila hili halituzuii kuuliza au kujiuliza kunani? Na kipi chanzo cha mwamko mdogo wa matumizi ya mtandao?

Kwa kifupi sababu ni nyingi na tofauti tofauti, kwanza uwezo wa baadhi ya watu kununua na kugharamia vifaa au vyombo vinavyowezesha matumizi ya mtandao ni mdogo. Vifaa kama simu bora na zenye uwezo, kompyuta za aina zote na vinginevyo imekua changamoto sana kwa mwananchi wa kawaida wa Tanzania kuweza kununua.

Sababu ya pili yaweza kuwa uwezo wa kutumia vifaa vya kimtandao nao ni tatizo kwa baadhi ya watu. Watu wengi wanashindwa kutumia mitandao mbalimbali kwasababu ule uwezo na ufahamu kuhusu mitandao ni tatizo.

Mtu hajui A’B’C zozote zinazohusu mitandao. Sababu nyingine yaweza kuwa utayari wa watu katika kutumia mitandao na mitandao ya jamii.

Unakuta mtu ana kompyuta, simu na kadhalika lakini anatumia kwa matumizi mengine kama kuangalia muvi, kucheza gemu, kupiga au kufanya kazi za ofisi na kushindwa kujiongeza kwamba kuna matumizi zaidi ya hapo.

Sababu zingine zinaweza kuwa ukosefu wa nishati ya umeme kwa baadhi ya maeneo nayo ni chanzo cha kuzembea kwa ukuajiwa watumiaji wa mitandao na mitandao ya jamii. Uzembe kwa baadhi ya watu, na vile vilemuundo wa majukumu na kazi tunazofanya hautupi mwanya wa kuhitaji kutumia mitandao kwa muda flani.

Kufuatia sheria mpya ya mitandao, nachelea kusema ya kwamba kiwango cha watumiaji kitakua kwa kasi ndogo sana na wakati mwwingine kinaweza kupungua kutokana na watu kushindwa kupata uhuru kama ilivyo sasa.